Sunday 8 February 2009

Nang Chauh

Van thengreng leh boruakah te, tuifinriat leh khawmual zau takah te hian hahchawlh theihna a awm lawm ni tiin nun chawlh hahdamna zawngin kan phiruai thin. A ni, he hringnunah hian thawhrimna leh lungngaihna chauh lo chu hringfate hian chanvo kan va nei chau em. Kan dam that lai hunte chu hlobet par ang chauh leh ni lo chhuaka tla leh mai thin ang chauh a ni si. Thlakhlelh nei nia kan inhriatna lai tak hi kan hlim lai tak a ni lek fang a, kan hlim kumhlun dawn emaw kan tih laiin he leia hmu leh tawh hauh lo tura inthen a tul leh si thin nen, khawiah hian nge kan duhthusam leh hlimna tluantling chu kan hmuh tak ang le, tia inngaihtuah lungpuam mai a awl thin. Mahse, kan beidawn hnu pawha kan beiseina nung awmchhun "Nang Chauh hi i ni Aw, Lalpa" titheitu apiang mai hi a kutchakin a chelh a, muanna leh hlimna thuruk a pe thin.


Kan mit hian khua a hmu thei lo a ni thei e, mahse kan bengin rimawi tinreng a hre thei ang. Kan beng pawh lo ngawng se, kan mit erawh chuan khaw eng mawi tak a hmu thei ngei ang. Kan kut leh ke te chu a piangsual a ni thei e, mahse kan thlarau chawlh hahdamna tur erawh min ngaihzual tirtu a ni a, natna khirh tak veiin thi thei reng dinhmunah pawh ding ila, kan thlarau leh kan taksa neitu angchhunga chawl tur kan nih avangin nghakhlel taka min thlir tirtu a ni thei tiin Lal Isua neitute chuan harsatna hrang hrang lakah pawh lawm takin an nihna an pawm thei mai thin. Joba chu a neih zawng zawng laksakin, a nupui leh fanau zawng zawngten an thihsan hnuah pawh a siamtu chuan a kalsan lo va, amahah a nung reng a ni tih a hriatin a vui lo va, a thlaphang hek lo. A nunah he lei taksa veivuta siam hi veivutah a kir leh ang a, a thlarau erawh a siamtu hnenah a chawl dawn a ni tih a hriatin hlim takin "Saruakin ka lo piang, saruak vekin ka kir leh dawn, mahse ka mamawh Lalpa ka neih avangin tunah hian ka lawm a ni" a tithei tlat zu nia.


Mizo nu zinga kan hriat hlawh tak tur Pi Lalsangzuali chu hun a hmangaih em em a fapa'n a thihsan thut a, hun rei vak lo hnuah, natna khirh takin a tlakbuak veleh ta bawk a, a mitin khua a hmu thei lo va, a lu a hai a, a chau a, daktawrte an beidawng tih a hria. Mahse, chu a natna khirh tak chu hnuchhawnin a siamtu hnenah a kir dawn ta tih a hria a, a hmangaih leh a thlakhlelh ngawih ngawih a pasal leh fanaute zinga awm reng thei a ni lo tih a hriat tlat avangin a rilruah a belh Pathian hnenah chuan hetiang hian a chham thei tlat zu nia. He hla hi a hla phuah hnuhnung ber a lo ni ta bawk. (A hnuaia music video hi)


KA DUH BER LALPA,
by: Lalsangzuali Sailo (L)

Hei leh chen kum tam min hruaitu,
Ka Lalpa, ka tan i va tha em,
Malsawm tinreng ka chhiar seng lo,
Hlim leh lawmna, chatuan nun nen,

I tel lo chuanin, mitkhap kar pawh ka nung zo lo,
Ka chau leh thin, nang chauh i ni, ka duh ber leh,
Chatuan thlenga ka belh tur chu.

Ka chhingmit khua fiah lo mah se,
Thlarau mitin a fiah chhandamtu,
Ka vui lo ve, engpawh thleng se,
Chatuan Van khawvar min hruai thleng ang.

Ka hahchawlhna leh thlamuanna,
Innghahna beisei dang ka nei lo,
Ka pumin nei rawh, ka inhlan e,
I angchhung muanna ka rawn pan e.

10 comments:

  1. I rawn sawi ang nun nei tute tluka he lei leh a piah lam ram chatuan hmun Vanram thlenga awhawm an awm lovang,harsatna karah pawh Lalpa a lo awm thin hi chu kan tan malsawmna a lo ni thin..sawi vak ka chak..

    ReplyDelete
  2. Hotupa, thlarau lam thupui pawh i lo va ti thei ve maw le!
    Pathian hnena, 'Nang chauh' tih te, 'Amen' tih te hi har tak a ni. Mahse chu chu min siamtuin min duhdan a ni si...

    ReplyDelete
  3. Hotupa, i thuziak a ropui hle mai. St. Augustine-a pawn, "Our hearts are restless until they find rest in you," a lo ti a. Khawvel thila kan mamawh chikim pawh hi nei mah ila, AMAH tel lo hi chuan he nun hi a chawl ngai lo vang. Rethei bakberhin, kut bengin awm mah ila, AMAH avang vek chuan mi hausa kan ni lawi si ang. He Kristian paradox hi khawvel mit atang chuan hriatthiam a har fo mai zawng a nih hi...

    ReplyDelete
  4. Hotupa, ziak tha hle mai. Chawlhna ram kan thlen hma loh zawng kan inthen zel zawng a ni. He dam chhunga thlarau lam chawlhna neitute chu khawvel harsatna natna, thihna te pawhin a tibuai tak tak thei lo a ni e.

    ReplyDelete
  5. Hotupa...i thusawi atang hian ...nangmah ngei pawh chutiang ang NUN HLU neitu i nih ngei ka ring tlat.Anitaka he khawvela awm hlen thei kan nilo tih kan hriat zelna hian PA hnen kan hawnna kawng atana thil pawimawhte min tih tir thin asin.KAN CHAKLOHNA te hian a mah kan mahmawhzia min hriattira,a mah min hnaih tir thin reng ani.

    ReplyDelete
  6. inthenna zawng mihring tan chuan a rawng lulai em a ni...Tunge tuarzo reng awm ang. Ngaihnawmin minti cool ruih mai.

    ReplyDelete
  7. Mizotawng ngei mai a i han hlap thin hian chhiar a ti nuam mange. Ka chhiar zo chiangkuang lo tlat ni dangah auh...

    ReplyDelete
  8. Kan hotuten in lo chhiar tih ka hriatin ka lawm hle mai.. a mal mal chuan ka chhang lo mai ang che u.. Cheers.

    ReplyDelete
  9. A tha khawp mai.. Mizo thu leh hla lampang kan zirlai min pui thei tur ang chi, a chepakaia hrilhfiahna ang chi te emaw tam tak hi chhiar mai theih tur awm thin se mizo ten a hma kan sawn na a ni dawn bawk nen thahnem ngaih a va na lehzual em..

    ReplyDelete